Тус газраас 2022 оны 03 дугаар сарын 25-ны өдөр зарласан ЭШ9 “Төрийн байгууллагаас хэрэгжүүлж байгаа бодлого, үйл ажиллагааны гүйцэтгэл, үр дүн болон иргэдэд хүргэж байгаа үйлчилгээний чанар, хүртээмж, шуурхай байдлын талаар иргэдийн хандлагыг тандан судлаж, түүнд дүн шинжилгээ хийх зөвлөх үйлчилгээ” төсөл, арга хэмжээний тендер шалгаруулалтад оролцохыг сонирхогч этгээдээс ирүүлсэн тодруулгад захиалагчаас дараах байдлаар хариу ирүүлсэн байна. Үүнд:

1. Монгол Улсын Засгийн газрын 206-р тогтоолоор “Бодлогын  баримт  бичгийн хэрэгжилт, захиргааны байгууллагын үйл ажиллагаанд хяналт-шинжилгээ, үнэлгээ хийх нийтлэг журам”-ын 9.6-д “Засгийн газрын Хэрэг эрхлэх газар жил бүр төрийн үйлчилгээний чанар, хүртээмжийн талаар хэрэглэгчийн үнэлгээ буюу судалгааг бүх аймаг, нийслэлийг хамруулан хийх ажлыг зохион байгуулна, шаардагдах зардлыг төсөвт тусгуулан батлуулсан байна. Захиргааны байгууллага салбарын болон орон нутгийн хэмжээнд бодлогын баримт бичгийн үр дүн, үр нөлөөг судлах, захиргааны байгууллагын үйл ажиллагааг сайжруулах зорилгоор хэрэглэгчийн үнэлгээ буюу судалгааг хийж болно. Хэрэглэгчийн үнэлгээг хийх хөндлөнгийн байгууллагыг судалгааны болон хяналт-шинжилгээ, үнэлгээний чиглэлээр ажилладаг төрийн бус байгууллагын дундаас ажлын туршлага, хүний нөөцийн чадал зэргийг харгалзан сонгон шалгаруулна” гэж заасан.

Засгийн газрын Хэрэг эрхлэх газрын даргын 2021 оны 10 дугаар сарын 29-ний өдрийн Удирдамж батлах тухай 76 дугаар тушаалын 2 дугаар хавсралтаар Хэрэглэгчийн үнэлгээний ерөнхий удирдамжийг батлагдсан бөгөөд тус удирдамжид,

• 2.1. Хэрэглэгчийн үнэлгээнд тухайн аймаг, нийслэл, сум, дүүргийн насанд хүрсэн иргэдийн 5-аас доошгүй хувийг хамруулна,
• 3.2. Нутгийн захиргааны байгууллага нь (цаашид байгууллага гэх) Засгийн газрын 2020 оны 206 дугаар тогтоолын 9.6-д заасны дагуу хэрэглэгчийн үнэлгээг хөндлөнгийн судалгааны байгууллагаар хийлгэж болно,
• 3.4. Хөндлөнгийн байгууллагыг сонгон шалгаруулахдаа энэхүү удирдамжийг удирдлага болгож, хэрэглэгчийн үнэлгээ хийх нарийвчилсан ажлын удирдамжийг боловсруулна,
• 3.6. Ажлын удирдамжид хэрэглэгчийн үнэлгээний зорилго, зорилт, тухайн үйл ажиллагааны хүрээ, нутаг дэвсгэрийн хүн амын тоог харгалзан түүврийн хэмжээ, санал асуулгын агуулга, үнэлгээний аргачлал, үнэлгээ хийх, тайлагнах хугацаа, үнэлгээний байгууллага, багт тавигдах шаардлага зэргийг тусгана.

гэж тус тус заасны дагуу уг зөвлөх үйлчилгээний төсөл, арга хэмжээг гүйцэтгэх Ажлын даалгаврыг холбогдох хууль, дүрэм, журамд нийцүүлэн боловсруулж баталгаажуулсан.

2. Монгол Улсын Засгийн газрын 206-р тогтоолоор “Бодлогын баримт бичгийн хэрэгжилт, захиргааны байгууллагын үйл ажиллагаанд хяналт-шинжилгээ, үнэлгээ хийх нийтлэг журам”-ын 9.6-д заасныг үндэслэн Монгол Улсын сайд, Засгийн газрын хэрэг эрхлэх газрын даргын 2021 оны 10 дугаар сарын 29-ны өдрийн 76 дугаар тушаалаар “Хэрэглэгчийн үнэлгээний ерөнхий удирдамж” батлагдсан бөгөөд удирдамжийг чиглэл болгон “Хэрэглэгчийн үнэлгээ” хийх зөвлөх үйлчилгээний ажлын даалгаврыг боловсруулсан. Зөвлөх үйлчилгээний гүйцэтгэгчийг сонгон шалгаруулах тендерийн баримт бичгийг боловсруулахдаа “Хэрэглэгчийн үнэлгээ” хийх зөвлөх үйлчилгээний ажлын даалгаврыг үндэслэл болгосон бөгөөд зөвлөх багийн бүрэлдэхүүнд дараах шаардлагууд тавигдсан. Үүнд:

• Гүйцэтгэгч нь зөвлөх багийг томилж ажиллуулах ба баг нь 10-аас доошгүй гишүүнтэй байна.
• Багийн ахлагч нь Судалгаа, төрийн бодлого, социологийн чиглэлээр магистр болон түүнээс дээш зэрэгтэй байх, мэргэжлээрээ 10 болон түүнээс дээш жил ажилласан туршлагатай байх,
• Баг нь нийт 8 судлаачтай байх бөгөөд 4 судлаач нь Социологич мэргэжилтэй, мэргэжлээрээ 5 болон түүнээс дээш жил ажилласан туршлагатай байх, нөгөө 4 судлаач нь Бакалавр болон түүнээс дээш зэрэгтэй байх (маркетингийн судлаач, статистикч гэх мэт мэргэжилтэй байх боломжтой), 5 болон түүнээс дээш жил ажилласан туршлагатай байх,
• Багийн Эдийн засагч нь нэг хүн байх бөгөөд Эдийн засагч эсвэл Бизнесийн удирдлага мэргэжилтэй, мэргэжлээрээ 3 болон түүнээс дээш жил ажилласан туршлагатай байх гэж тус тус заасан.

Судалгааны багийн ахлагч болон 4 судлаач нь буюу багийн 10 гишүүний 5 нь тухайн байгууллагын үндсэн ажилтан байхыг шаарджээ. Үндсэн ажилтан болох 4 судлаач нь заавал Социологич мэргэжилтэй байх шаардлагагүй юм. Мөн Социологич мэргэжилтэй судлаачдыг хөлсөөр ажиллуулах гэрээний үндсэн дээр ажиллуулж болох зохицуулалттай.

Тухайн зөвлөх үйлчилгээний төсөл, арга хэмжээ нь бүх аймаг, нийслэл буюу улсын хэмжээнд түүвэрлэгдэн хийгдэх судалгаа бөгөөд ажлын цар хүрээ өргөн, судалгааны ажлын агуулга нь төрийн байгууллагаас хэрэгжүүлж буй бодлого, үйл ажиллагааны нийгэмд үзүүлж буй нөлөөлөл, хандлага, үр дүнг судлаж, дүн шинжилгээ хийх үндсэн зорилготой юм. Тиймээс тус зөвлөх үйлчилгээг гүйцэтгэгч байгууллагад ялангуяа боловсон хүчин, хүний нөөцөд тавигдах шалгуур үзүүлэлтүүдийг судалгааны үндсэн зорилго, агуулгатай уялдуулж боловсруулсан болно.

Иймд тендер шалгаруулалтад оролцохыг сонирхогч этгээдээс ирүүлсэн тодруулгын дагуу ажлын даалгавар болон тендерийн баримт бичигт өөрчлөлт оруулах боломжгүй байна.

Жич: Тендерийн баримт бичгийн Хоёрдугаар бүлэг: Зөвлөхийн санал бэлтгэх зааварчилгааны 6.1-д: “ ... Саналыг үнэлэх, тэдгээрийг харьцуулах болон гэрээ байгуулах эрх олгох ажиллагаанд нөлөөлөхийг завдсан аливаа зөвлөхийн үйлдэл нь түүний тендерээс татгалзах үндэслэл болж болно” гэж заасныг анхаарна уу.